गझल
वृत्त: देवराज
लगावली:गालगाल गालगाल गालगाल गालगा
***************************************************
रोज पाहिजे तुला बहार जीवनामधे!
पाहिजे वसंतही तसाच काळजामधे!!
भेटलीस तू मला, सुमार तो दुपारचा;
ती नशा, तशी मजा, न आज चांदण्यामधे!
चेहऱ्यामधे तुझ्या छटा तरी अशा किती?
पाहतो तुझी छबी हरेक चेहऱ्यामधे!
पारिजात ढाळतो फुलेच आसवांपरी;
वाट पाहतो तुझी अजून अंगणामधे!
लाख शिंपल्यांमधे मिळेल मोतशिंपही;
जीव गुंतवू नये, हरेक शिंपल्यामधे!
हा नव्हे समुद्र, ही धरेवरील आसवे!
जी पुसायला नदी मिळेल सागरामधे!
कुंतलामधे मला जरी न माळलेस तू;
घुंगरू बनून मी वसेन पैजणामधे!
पावसावरी कुणी लिहील खण्डकाव्यही;
पावसातली मजा कळेल पावसामधे!
-------प्रा.सतीश देवपूरकर
भूशास्त्र व खानिज तेल तंत्रज्ञान विभाग,
नौरोसजी वाडिया महाविद्यालय, पुणे.
फोन नंबर: ९८२२७८४९६१