गझल
वृत्त: समजाती-पद्मावर्तनी-बालनंद-मात्रावृत्त
मात्रा: ८+६=१४ मात्रा
******************************************************
मन माझे ऐकत नाही!
कळते पण वळतच नाही!!

वाटते तुला बोलावे.....
वेळेला स्मरतच नाही!

हरवते तुझ्यातच इतकी.....
मी मला सापडत नाही!

ओठांवर तुझीच वस्ती....
पण, तू तर भेटत नाही!

तू समोर असतो तेव्हा....
मी माझी असतच नाही!

प्राजक्त तूच रे माझा.....
माझ्यातच मावत नाही!

एकटी कशी राहू मी?
मज तुला सोडवत नाही!

सर्वस्व दिले मी तुजला....
मी मागे उरतच नाही!

मन तुझ्यात असते माझे.....
पण, तुलाच समजत नाही!

हो शब्द शब्द तू माझा.....
कविता मज सुचतच नाही!

-------प्रा.सतीश देवपूरकर
भूशास्त्र व खानिज तेल तंत्रज्ञान विभाग,
नौरोसजी वाडिया महाविद्यालय, पुणे.
फोन नंबर: ९८२२७८४९६१