कोण स्वत:चा असतो? सारे गुलाम संबंधांचे

ब्रह्म स्वयंभू, बाकी येथे तमाम संबंधांचे

 
कूस सवाष्णेची, पण दिसते कपाळ वैधव्याचे

पोर निरागस असुनी ठरते हराम संबंधांचे

 
रोग दुराव्याचा दोघांच्या मनास जडला असता

दु:खद नात्यावर चोपडतात बाम संबंधांचे

 
लाभ सहज होतो ज्याचा ते सहज विसरले जाते

मोल करी ना कोणी हल्ली छदाम संबंधांचे

 
थेट अनादी कालापासून सामने चुरशीचे

स्त्री-पुरुषांच्या मेळाचे, साम-दाम संबंधांचे

 
यौवन येता वात्सल्याचे, जरेत मग गात्रांचे

'भृंग', जगी चुकले कोणाला विराम संबंधांचे?