आज माझ्या देशात देवा - सारे काही ठीक आहे ...
कुणी गरीब, कंगाल कुणी - कुणी मात्र श्रीमंत आहेत |
जगण्याच्या लढाईमध्ये - जनता सारी व्यस्त आहे
महागाई आणि भ्रष्टाचाराने - थोडी फार त्रस्त आहे |
रस्त्यांवर चारचाकी, रोज रोज वाढत आहेत
पुला खाली आडोशाला - बेघरांचे जथे आहेत |
पावसाच्या काही सरी - नेतात रस्ते पाण्याखाली
जनतेचे सेवक मात्र - मागतात थोडी चिरीमिरी |
बॉम्बस्फोट, टोळीयुद्ध - सारे काही सुरळीत आहे
चौकाचौकात भिकारी - त्यांना कायद्याचा धाक आहे |
अणू स्फोट करुन काही - भारत शक्तीशाली होतो
समुद्रातून येउन मृत्यु - रस्त्यांवर थैमान घालतो |
लोकांनाही त्याचे भय - आता फारसे वाटत नाही
मोठ्या मोठ्या शहरांसाठी - अशा घटना विशेष नाहीत |
धर्मांधतेची जीत सदा - सहिष्णुता पराजीत आहे
थोडे फार भांडण, तंटे ....पण बाकी सारे ठीक आहे |
आज माझ्या देशात देवा सारे काही ठीक आहे ...
कुठे पूर आणि दुष्काळ - शेतकर्‍याच्या गळा फास
भेगाळलेल्या जमिनी मधे - माय-लेकराची अश्रुधार |
धान्य कुठे सडते अन् - तळमळते कुठे उपाशी पोर
बेफिकीर धनदांडगे अन् सामान्यांच्या जीवा घोर |
चोरांची इथे शिरजोरी - सामान्याला मात्र काठी
बळी तोच कान पिळी - मग कायदे कानून कोणासाठी?
औषध नाही, डॉक्टर नाहीत - साथीचे सारे रोग आहेत
संशोधन आणि प्रयोगांसाठी - गिनीपिग्ज् इथे खूप आहेत |
रस्ते नाहीत, शाळा नाहीत - वीज आणि पाणी नाही
कोणाला तू साकडे घालशील? - नशीब तुझे सरळ नाही |
उन, थंडी, वारा, पाऊस - लेकरा, नको रे काही मागु
लाल दिव्याच्या गाडीला - उगीच नको बोल लावू |
विठ्ठलाच्या भेटी साठी - वारकरी आसूसलेला
चंद्रभागेचा पान्हा - पण एकदशीला आटलेला |
शिर्डीच्या फकीराला बघ रेशमाची शाल आहे
सामान्याला वस्त्र नाही ...पण बाकी सारे ठीक आहे |
नशिबाने गांजलेल्या लोकांचा थोडा क्षोभ आहे
सुख थोडे - दु:ख फार ....पण बाकी सारे ठीक आहे ।
आज माझ्या देशात देवा सारे काही ठीक आहे ..