भाषा

लेखी बोली चित्र मुकी
भाषा येओ कुठल्याही रुपे
कुणा कुणाला भावून जाई
तर कुणाच्या मनी खुपे

भाषा अगदी पाण्या सारखी
जिला स्वत:चा रंग नाही
देणार्‍याने दिलेला घेणार्‍याने घेतलेला
रंग सदा वहात राही

भाषा अगदी पाण्या सारखी
सात्विक अन जीवनदायी
उगाच कुणी दुष्ट त्यात
मनचे विष कालवत राही

भाषा अगदी पाण्या सारखी
बरेचजण वापरतात
उगाच आपली आहे म्हणून
इथे तिथे सांडत असतात

भाषा अगदी पाण्या सारखी
निर्मळ अन प्रवाही
जिथे जिथे जीवन आहे
तिथे तिथे वहात राही

कुणी म्हणेल भाषेला
पाण्या इतकं महत्व नाही
तरी शेवटी तिच्या शिवाय
पाणी मागता येत नाही

सुधीर