प्रस्तावना
आधी माझं तिच्यावर प्रेम करणं,
मग तिच्यासाठी झुरणं
खूपसं सरूनही काहीतरी उरणं
माझं स्वत:शीच भांडणं
आणि मग ही कविता लिहिणं......
ती तू आणि मी
मी जिच्यावर प्रेम केलं ,
ती तू नाही असू शकत;
ती माझ्यासाठी जगते
तू नाही जगू शकत !!१!!
मी रोज ठरवतो ,
आता तुला भेटायचं नाही;
आणि डोळे मिटल्यावर पापणीत
तिचं चित्र उमटायचं राहात नाही !!२!!
तुझ्याशी न बोलता , न भेटता ,
मी राहू शकतो , जगू शकतो;
पण तिच्याशिवाय मात्र ,
एक क्षणही युगासारखा भासतो !!३!!
आम्हा दोघांमध्ये भांडणं होत नाहीत,
कारण ती मिटवायला दोघंही तयार असतो;
आपल्या दोघांमध्ये मात्र,
बिनभांडणाचाच अबोला चालतो !!४!!
मला माहिती आहे,
तू माझी नाही असू शकत;
पण ती मात्र कधी
दुसर्‍याची नाही होऊ शकत !!५!!
तुम्हा दोघींमध्ये एवढा फरक असूनही
माझा जीव दोघींत सारखाच गुंतला आहे;
कारण खरं सांगायचं तर,
तू माझ्या पुढ्यात आणि ती माझ्या मनात आहे !!६!!
तुझा चेहरा काय, मी केंव्हाही पाहू शकतो,
पण तिचा चेहरा मात्र मी अजून नाही पाहिलेला;
पण जेंव्हा जेंव्हा मी विचार करतो 'तो कसा असेल?'
तेंव्हा मला तो सपडतो "तुझ्या चेहर्‍यामध्ये" दडलेला !!७!!