मोबाईल मुळे निरोप पाठवण्याची सुंदर सोय झाली आहे.  मित्र मैत्रिणीची मोबाईल वर झालेली ही दूर निरोपांची देवाण घेवाण कशी वाटते बघा.

मन तृषार्त आहे माझे
पाऊस होऊनी ये ना
चिंब चिंब भिजवूनी
तू पुन्हा परतुनी जा ना

नभी ओथंबून तू येता
पाऊस चिंब होईन मी
मऊ मृदुल करांनी तुजला
माझ्यात मिटून घेईन मी

कशी जपू जिवाला माझ्या
तू दूर दूर असताना
कशी सावरून थांबू मी
तू कोसळून येताना

शब्दांनी अंतर मिटता
तू आसपास वावरशी
मी उदास होऊन बसता
तू खुदकन हसवुन जाशी

मनी ओलावा जो माझ्या
अक्षरात पाझरून येतो
माझ्याही नकळत माझा
शब्दच हळवा होतो

तुषार जोशी, नागपूर
(यातले अर्धे निरोप मी लिहिलेत)