मंद गॅसवर कढई ठेवून त्यात तूप घालावे. तूप तापले की त्यात जीरे घालावे. जीरे तडतडून लालसर झाले की त्यात मिरच्यांचे तुकडे टाकावे. मिरच्यांचे तुकडे जरा तळले गेले की त्यात पाण्यात ठेवलेल्या बटाट्याच्या काचर्या, पाणी निथळून काढून, टाकाव्यात. झाकण ठेवून एक दणदणीत वाफ द्यावी. (पण जळू देऊ नये.)
बटाटे शिजले की साबुदाणा, दाण्याचा कूट, मीठ, साखर, नारळाचे तुकडे घालून नीट परतून घ्यावे. तूप कमी वाटत असेल तर वरून किंचीत टाकावे आणि साबुदाणा पुन्हा परतावा. या नंतर, गॅस मंद करून झाकण ठेऊन खिचडीला एक वाफ द्यावी. ४-५ मिनिटांनी झाकण काढून खिचडी वरखाली करून मोकळी करून घ्यावी. अर्धे लींबू पिळावे.
साबुदाणे वेगवेगळ्या पदार्थांसाठी वेगवेगळे मिळतात. एकदम बारीक साबुदाणा दाक्षिणात्य पायसम (खीर) साठी वापरतात. एकदम मोठा साबुदाणा चिवड्यासाठी वापरतात. (यालाच नायलॉनचा साबुदाणा असेही म्हणतात. खिचडीचा साबुदाणा मध्यम आकाराचा, अपारदर्शक, एकाच आकाराचा असावा. साबुदाणा एकदाच घुवावा. जास्त धुऊ नये. धूतल्यावर त्यातील सर्व पाणी काढून टाकावे. आणि तो धूतलेला साबुदाणा तसाच झाकून ३-४ तास ठेवावा. नंतर, तो हाताने चोळून मोकळा करून घ्यावा. साबुदाणा व्यवस्थित भिजला असेल तर तो वरून कोरडा लागतो. एक दाणा चावून बघितल्यावर आत कणी (कडक अंश) लागत नाही.
खिचडी देताना त्यावर खवलेला नारळ आणि कोथिंबीर भुरभुरून द्यावी. आवडत असल्यास सोबत गोड दह्याची कवड द्यावी.
निरंतर ऊर्ध्वश्रेणीकरण
पायाभूत सुविधांमध्ये सातत्याने होत असलेली दैनंदिन प्रगती पाहून यापुढे मनोगतासाठी निरंतर ऊर्ध्वश्रेणीकरणाचा अंगीकार करणे उचित दिसत आहे. त्याप्रमाणे आवश्यक ते बदल व्यवस्थेत केले जात आहेत. manogat.prashaasak@gmail.com ह्या पत्त्यावर आपल्या अडचणी व/वा सुचवणी विपत्राने कळवता येतील.