पुन: पुन: मी तेच गुन्हे करणार कसे?
पुन: तुला अन माझे मी म्हणणार कसे?...
झोपेमधुनी जागा झालो मधेच मी
अर्धे-अपुरे स्वप्न पुन: बघणार कसे?...
तुझ्याच गावी लपून, चोरुन असतो मी
कुशल तुझे पण कुणास मी पुसणार कसे?...
आठवणींच्या वादळात मी विस्कटतो
पुन: नव्याने स्वतःस सावरणार कसे?...
श्वास, स्पंदने एकच झाली दोघांची
तुझ्या मिठीतुन आता मी सुटणार कसे?...
बेचैनीतच इतका असतो 'अजब', मला-
कवितेखेरिज काही मग सुचणार कसे?...
