"...भांड्याला भांडं लागायचंच,
त्यात काय मोठंसं?"
गुळगुळीत, क्लिशे बनलेलं वाक्य
बहुतेक क्लिशेंप्रमाणे सत्यावर आधारित
- काही प्रमाणात.

नसेलही  त्यात काही मोठंसं
पण प्रत्येक वेळी भांड्याला पोचा येतोच
कधी लहान
कधी मोठा
पण कायमचा
भांड्याचा आकार बदलणारा,
विद्रूप करणारा.

पोच्यांची संख्या वाढत जाते
अपरिहार्यपणे
आणि एक दिवशी भांड्याचा मूळ आकार
ओळखू येईनासा होतो
अन् तरी हिंमत होत नाही
नवं भांडं घेण्याची...
नवे पोचे घेण्याची...