वेगळेपण विरघळाया लागले
उमलुनी मी परिमळाया लागले
भासला तो चंदनाचे रान; मी
नागिणीसम सळसळाया लागले
गाजवाया लागता अधिकार तो
सर्व संयम डळमळाया लागले
व्यक्त मी आलिंगनी झाले अशी
प्रेम त्यालाही कळाया लागले
पेटली संसारहोत्राची धुनी
होउनी समिधा जळाया लागले
लाजण्या-रुसण्यात सरली रात्र अन्
तांबडे फुटुनी छळाया लागले
नयन ना विरहात जे पाणावले
मीलनी का भळभळाया लागले ?
नाहता ज्योत्स्नेत काया मृण्मयी
अंबरी तारे चळाया लागले