.......................................
शिकार!
...............................................
उन्हास या कोवळ्या कशी काय धार येते ?
कशी सकाळीच कोण जाणे दुपार येते !
कधी तरी भेटतो जुना मित्र ऐनवेळी...
तशात होतात छान गप्पा... बहार येते !
सदैव हा माळ तापलेलाच पाहतो मी...
झुळूक येथे कधी तरी एक गार येते !
कुणीच नाही मनास या छेडले तरीही...
कशी कळेना मलाच ऐकू सतार येते !
फिरून मी पाहतो सुखाचा प्रसन्न वाडा...
मध्येच बाहेर दुःख, उघडून दार येते !
कधी कधी राग राग येतो तुझा परंतू...
कधी कधी कीवही तुझी फार फार येते !
धरून तू नेम बैस़; ध्यानात ठेव हेही...
तशी मलाही, करायची तर, शिकार येते !!
- प्रदीप कुलकर्णी
.......................................
रचनाकाल ः २ नोव्हेंबर २००८
.......................................