(या प्रसंगांमधला ‘तेव्हा’ म्हणजे साधारण वीस वर्षांपूर्वीचा काळ आणि ‘आता’ म्हणजे सध्याचा काळ समजावा. )
---------------------------------------------------------------------
तेव्हा
मुलगी (वय वर्षे १४) : आई, शाळेच्या युनिफॉर्मला इस्त्री करू?
आई : युनिफॉर्मला काय करायचीये इस्त्री-बिस्त्री? उगीच नुसते नखरे नकोयेत शाळेत जाताना...!!
आता
आई : अगं, किती हा आळशीपणा... युनिफॉर्मला जरा इस्त्री-बिस्त्री कर ना.
मुलगी (वय वर्षे १४) : असू दे गं! मला बोअर होतं रोज-रोज इस्त्री करायला...
------------------------------------------------
तेव्हा
वडील (आपल्या शाळकरी मुलाला) : अरे, काय सारखी रेडियोवरची गाणी ऐकत बसतोस... जरा कधीतरी बाहेर खेळत जा...
आता
वडील (आपल्या शाळकरी मुलाला) : अरे, काय सारख्या व्हिडीओ गेम्स खेळत असतोस... जरा कधीतरी गाणी-बिणी पण ऐकत जा...!!!
------------------------------------------------
तेव्हा
मुलगा : आई, या सुट्टीत पण बालनाट्य बघायला नेशील ना, प्लीऽऽऽज...
आता
मुलगा : या सुट्टीत पण बालनाट्य?? नको ऽऽऽ... आई, प्लीऽऽज!
------------------------------------------------
तेव्हा
एक मुलगा (आपल्या मित्राला) : या रविवारी माझा सगळा अभ्यास झाला की माझे बाबा मला त्यांचा कॅल्क्युलेटर देणारेऽऽत खेळायला...
आता
एक मुलगा (वैतागून आपल्या मित्राला) : रविवारी बाबा घरात असतात. माझा अभ्यास झाल्यावरसुद्धा मला मोबाईलवरच्या गेम्स खेळू देत नाहीत.
------------------------------------------------
तेव्हा
बायको : आज ऑफिसला नको ना जाऊस...
नवरा : नाही, नाही... मला जायला पाहिजे.
आता
नवरा : आज कंटाळा आलाय, आज मी नाही जात ऑफिसला.
बायको : काऽऽ? जा ना! तू गेला नाहीस की माझं सगळं रुटीन बिघडतं...
------------------------------------------------
तेव्हा
एक मैत्रीण (दुसऱ्या मैत्रिणीला) : शी! आमच्या सासूबाईंना मी ड्रेस घातलेला पण चालत नाही...!
आता
एक मैत्रीण (दुसऱ्या मैत्रिणीला) : शी! आमच्या सासूबाई स्लीव्हलेस ड्रेस घालतात... मला अजिब्बात आवडत नाही!!
------------------------------------------------
तेव्हा
एक तरूणी (आपल्या होणाऱ्या नवऱ्याला) : लग्नानंतर आपण वेगळं रहायचं हं... मला नाही रहायचं तुझ्या आईसोबत...
आता
एक बाई (आपल्या तरूण मुलाला) : लग्नानंतर तुम्ही दोघं वेगळे राहा हं... मला नाही रहायचं तुझ्या बायकोसोबत...
------------------------------------------------
तेव्हा
एक कॉलेज युवक (मित्राला) : मला रेडियोवरची गाणी बोअर होतात. मी फावल्या वेळात टी. व्ही. च बघतो.
आता
एक कॉलेज युवक (मित्राला) : मला टी. व्ही. सीरियल्स बोअर होतात. मी फावल्या वेळात मोबाईलवर एफ. एम. रेडीयो ऐकत बसतो.
------------------------------------------------
तेव्हा
एक आजी (खिडकीतून बाहेर बघत त्रासल्या चेहऱ्यानं) : छे! किती कोसळतोय हा पाऊस! सप्टेंबर उजाडला. देवा, आता जरा उघडीप मिळू दे रे, बाबा!
आता
एक आजी (खिडकीतून बाहेर बघत त्रासल्या चेहऱ्यानं) : छे! किती उकडतंय! ऑगस्ट सरला. देवा, आता तरी थोडा पाऊस पडू दे रे, बाबा!
------------------------------------------------
जमाना खरंच बदललाय, नै!