दुसरे असे की हिंदी न्यूज चॅनल वाल्यांना जया बच्चन यांचा खुला मराठी द्वेष, अबू आझमी यांची गुन्हेगारी पार्श्वभूमी तसेच २५ वर्षे मुंबई-महाराष्ट्रात राहूनही मराठी बोलता न येणे आणि विधानसभेत मराठीत बोलायची विनंती केल्यावर चप्पल उगारणे, इतके सगळे झाल्यानंतरही समाजवादी पार्टीतर्फे त्यांचा जाहीर सत्कार होणे, उत्तर प्रदेश आणि बिहार मधल्या नेत्यांची महाराष्ट्राच्या नेत्यावर तसेच राजकारणावर केलेली बेताल आणि उद्धट वक्तव्ये या सगळ्यात काहीही घटनाबाह्य, लोकशाहीला मारक, देशाच्या एकतेला मारक, मुजोर, प्रक्षोभक, दहशत निर्माण करण्याचा प्रयत्न अस काहीही वाटत नाही का? आणि जर वाटत असेल तर मराठीच्या नावाने शंख फुंकण्यासारखी तत्परता या गोष्टीत का दाखवली जात नाही? निदान संयुक्त महाराष्ट्राच्या चळवळीचा साधा उल्लेख देखिल कुठल्याही हिंदी न्यूज चॅनल वाल्यांनी केलेला आठवत नाही. उत्तर प्रदेश दिन आणि छटपूजा मात्र हे कधीही विसरत नाहीत. अशा वेळी कुठेतरी पक्षपातीपणा होतो आहे असे वाटल्याशिवाय राहत नाही. आपण नक्की लोकांना काय दाखवतो आहोत, त्याचा नक्की लोकांच्या, समाजाच्या मनावर काय परिणाम होत असेल, परिस्थिती आपल्या अशा दृष्टिकोनामुळे कायम होते आहे, बिघडलेल्या परिस्थितीचे आपण रक्षणकर्ते होत आहोत असा विचार हिंदी न्यूज चॅनल वाले कधी करणार? वर मराठी नेत्यांना आणि नगरसेवकांना दहशतवादी म्हणणारे हिंदी न्यूज चॅनल चे पक्षपाती पत्रकार स्वतः दुसरे काय करत असतात? पण याना कोणी प्रश्न विचारायचे? कोणी जाब विचारायचे? कारण हे म्हणजे लोकशाहीचे, घटनेचे, माणुसकीचे, बंधुभावाचे, देशप्रेमाचे, देशाच्या एकतेचे एकमेव स्वयंघोषित रक्षणकर्ते आहेत नाही का!