जाल फेकणे, शिकार करणे शिकू लागले डोळे
उगाच का माझ्यावर सारे खिळू लागले डोळे ?
सलज्ज झुकणे कुठे हरवले प्रवाहात काळाच्या ?
उघड उघड शारीर दवंडी पिटू लागले डोळे
नको, नको ते खूप पाहिले, विझू लागले डोळे
इतकी हसले आयुष्याला, भिजू लागले डोळे
वही गुलाबी गालांची अन् स्वप्नभंग प्रेरणा
काजळ-अश्रूंच्या शाईने लिहू लागले डोळे
मुक्ताई मी, मीच जनी, आणि पतित कान्होपात्रा
तुझ्या पाउली अखेर माझे, विठू, लागले डोळे