वाटतो जरी प्रसन्न मी वरुन,
दु:ख साचलेय आत भरभरुन
झाकले उघड कसे करायचे?
ठेवले बरेच आज आवरुन
जिंकली असंख्य सौख्यसाधने
डाव जीवनात सारखे हरुन
धूम वारु दौडते मनातले
मी तसाच बांधतो पुन्हा धरुन
पोहणे न ज्ञात जाहले मला
जीवनात मी तरी असे तरुन
शुष्क भावना......... तरी तुझ्या सवे,
घाम का फुटे उगाच दरदरुन?
गंध काय आज जाणले जरी,
दु:ख जाहले फुलास कुस्करुन
काळ यायची अवेळ जाहली
वाट पाहतो स्वतःस सावरुन
--डॉ.कैलास गायकवाड
