असा पाऊस झडला
असा पाऊस झडला
सह्यगिरी पान्हावला
कातळाच्या थानातुनी
लोट दुधाळ वाहिला
असा पाऊस झडला
झडे सरी वर सरी
न्हात्या-धुत्या धरेवरी
थेंब थेंब नाच करी
असा पाऊस झडला
आला गाभोळ रानाला
कोंब हिरव्या स्वप्नाचा
ओल्या मातीला लुचला
असा पाऊस झडला
झडे पानांतुनी मोती
गवताच्या पातीवर
हिरकण्या तेजाळती
असा पाऊस झडला
मोर उरात नाचला
बाल आठवांचा पुर
डोळ्या पुढूनी वाहिला
---उद्धव कराड, (मो. नं. ९८५०६८३०४५)
मु. जळगाव, ता. निफाड, जि. नाशिक.
