नटावे लागते आहे, सजावे लागते आहे

कराराच्याप्रमाणे देह व्हावे लागते आहे

कधी विधवा, कधी पत्नी बनावे लागते आहे 

सती जावे, सतीचे वाण घ्यावे लागते आहे

 
कधी होत्या जिथे ज्वाळा तिथे धग राहिली थोडी

उतू गेल्याविना आता निवावे लागते आहे

 
मृतांचा कोण हेवा वाटतो आम्हा जिवंतांना

तुम्ही सुटलात, आम्हाला जळावे लागते आहे

कळेना कावळ्यांवर, मृण्मयी, ही वेळ का आली  

स्त्रियांना आणि पिंडांना शिवावे लागते आहे