या श्लोकात जनक म्हणतो की  जाणणं, जाणलेलं आणि जाणणारा ही त्रयी वास्तविक नाही.  अज्ञानामुळे ही त्रयी ज्यावर भासते तो शुद्ध निरंजन मी आहे. 

वास्तविकात जाणणारा असा कुणीही नाही कारण जाणणं ही निराकारात घडणारी प्रक्रिया आहे. चालताना तीन गोष्टी भासतात, चालतोय हे ज्ञान, ज्यामुळे ते होतंय ती जाणीव आणि जो चालतोय तो ज्ञाता.  या तीन गोष्टी भासण्याचं एकमेव कारण म्हणजे आपण स्वतःला शरीर समजणं.  कारण वास्तविकात देह चालतोय आणि मेंदूत त्याची जाणीव होतेय;  चालणारा असा कुणीही नाही. आणि ही घटना ज्यावर घडतेय तो निराकार आपण आहोत.  आपण घटनेपासून अबाधित आहोत कारण जे काही घडायचं ते देहाला घडेल; आपल्याला नाही.  त्यामुळे जनक म्हणतो ही त्रयी ज्यावर भासते तो शुद्ध निरंजन मी आहे.