२ मध्यम कांदे, ४ मध्यम टॉमेटो, १ मध्यम कूर्जेट, २ मध्यम ढोबळ्या मिरच्या
जिरे, मिरपूड, मीठ, पाणी इ.
अडीच तास
४ जणांना पोटभर
माहजूब हा अल्जीरियन न्याहरीचा पदार्थ आहे. रव्याच्या आवरणात भाजीचे सारण भरून तो करतात.
आवरण
एका मोठ्या परातीत रवा घेऊन, त्यात चवीप्रमाणे मीठ घालावे. दोन चमचे तेल घालावे. मीठ व तेल रव्यात नीट मिसळून घ्यावे. आता लागेल तसे पाणी घालून रवा भिजवावा. रवा अगदी मऊ भिजला पाहिजे. ५०० ग्रॅ रव्याला मला साधारण पेलाभर पाणी लागले. पीठ मिळून येण्यासाठी वरून तेल घालावे. मी साधारण अर्धी वाटी तेल वापरले. रवा नीट भिजला की नाही हे ओळखण्यासाठी चाचणी अशी: भिजलेल्या पिठाचा एक मोठा लंबगोळा करावा. त्याच्या एका बाजूला थोडे अंतर सोडून हाताची मूठ वळावी (म्ह. वळण्याचा प्रयत्न करावा). पीठ अंगठा व तर्जनी यांच्या मधून बाहेर येण्याचा प्रयत्न करेल. हा बाहेर येणारा छोटा गोळा आपोआप पिठापासून सुटला पाहिजे. असे छोटे गोळे करून परातीत ओल्या कापडाखाली झाकून ठेवावेत. एकदा सुटलेल्या गोळ्यांना आकार देण्याचा किंवा मळण्याचा यत्न करू नये. चुकून एखादा दाबला गेला तर परत मोठ्या गोळ्यात मिसळून घ्यावा. एका गोळ्याचा व्यास साधारण ३ सेमी. हे छोटे गोळे किमान अर्धा तास मुरू द्यावेत.
(लागणारा वेळ दीड तास)
सारण
कांदे, टॉमेटो, कूर्जेट (courget), ढो. मिरच्या अश्या सगळ्या भाज्या चिरून घ्याव्या. आवडीप्रमाणे परतल्यावर शिजणाऱ्या कुठल्याही भाज्या वापरल्या तरी चालेल. कढईत दोन चमचे तेल तापवावे; जिरे घालून, चिरलेल्या भाज्या घालून परतून घ्यावे. मीठ, मिरपूड व आवडीप्रमाणे इतर मसाले घालावे.
(लागणारा वेळ अर्धा तास)
माहजूब
तवा मध्यम आंचेवर तापायला ठेवावा. दोन्ही हाताचे तळवे तेलात बुडवून घ्यावे. पोळपाटाला तेल लावून घ्यावे. एक छोटा गोळा पोळपाटावर ठेवून हलक्या हाताने थापटून साधारण पुरीच्या आकाराएव्हढा (~ १०/१२ सेमी व्यास) पसरवून घ्यावा. पुरीच्या कडा चिमटीत पकडून पुरीच्या मध्याच्या विरुद्ध दिशेत ताणावे. बारा वाजण्याच्या घड्याळाच्या काट्यांच्या जागेपासून ताणायला सुरुवात करावी. दोन, चार, सहा, आठ व दहा वाजण्याच्या छोट्या काट्याच्या जागांपासून ताणावे. ताणलेली पुरी/ पोळी साधारण २५ ते ३० सेमी व्यासाची होईल. पुरीचा मधला भाग दाटसर तर ताणलेला भाग पातळ, जवळपास पारदर्शक असा असावा. मधल्या भागावर सारणाचा पातळ थर पसरवून घ्यावा. आता पत्राच्या पाकिटाप्रमाणे घड्या घालून माहजूब बंद करावा. माहजूब आयताकृती किंवा चौरसाकृती (मोठ्या पाकिटासारखा) दिसतो. हलक्या हाताने उचलून तो तापलेल्या तव्यावर ठेवावा. तीन चार वेळा उलटून नीट शिजवून घ्यावा. असे सगळे माहजूब करावेत. दिलेल्या साहित्यात साधारण १५ माहजूब होतात.
(लागणारा वेळ १ तास)
माहजूब शीतकपाटात छान राहतात. खाण्याच्या वेळी काढून साध्या किंवा सूक्ष्मलहरी भट्टीत गरम करून घ्यायचे म्हणजे झाले. डब्यात घेऊन जायला (कचेरीत भट्टी असेल तर) सोयीचे.
खोबऱ्याची चटणी, चिंचेची चटणी, टक्कू असल्या तोंडीलावण्यांबरोबरही छान लागतात.
अल्जीरियन मैत्रिणी सब्रिना, जोहरा, रादिया व समिरा
निरंतर ऊर्ध्वश्रेणीकरण
पायाभूत सुविधांमध्ये सातत्याने होत असलेली दैनंदिन प्रगती पाहून यापुढे मनोगतासाठी निरंतर ऊर्ध्वश्रेणीकरणाचा अंगीकार करणे उचित दिसत आहे. त्याप्रमाणे आवश्यक ते बदल व्यवस्थेत केले जात आहेत. manogat.prashaasak@gmail.com ह्या पत्त्यावर आपल्या अडचणी व/वा सुचवणी विपत्राने कळवता येतील.