हिरव्या मिरच्या तव्यावर किंवा कढईत भाजून घ्याव्यात. भाजताना त्यावर अर्धा चमचा तेल सोडावे. पांढऱ्या होत आल्या की लगेच खलांत टाकाव्यात. (काळपट होईपर्यंत भाजू नयेत).
त्याबरोबर १ गड्डा सोललेल्या लसणाच्या पाकळ्या घ्याव्यात. चवीनुसार मीठ बरोबर घेऊन खलबत्त्यात चांगल्या ठेचाव्यात. लसूण व मिरच्या चांगल्या एकजीव होई पर्यंत ठेचल्यावर एका वाडग्यात काढून त्यावर १ चमचा दाण्याचा कूट व बारीक चिरलेली कोथिंबिर टाकून परत एकजीव करणे.
झाला ठेचा तयार !
१. ठेच्याला मिरच्या जाड, लांब व पोपटी रंगाच्या मिळाल्यास उत्तम (काळपट हिरव्या नकोत).
२. मिरच्या गरम असतानाच ठेचायला घ्याव्यात. तिखटाची मात्रा लसणाने कमी/जास्त करावी. ठेचताना थेंबभर तेल अधून मधून वरून सोडत राहिल्यास ठेचा चवीला सुंदर होतो तसेच ठेचायला सोपा जातो.
३. ठेचणे हा प्रकार मन लावून करावा - मिक्सर मधील ठेच्याला चव येत नाही. - लाकडी बडगी व ठेचणी असल्यास उत्तम.
४. दशम्या, भाकरी, ठेपला, पोळी तत्सम कुठल्याही पदार्थाबरोबर छान लागतो.
५. प्रमाणात सेवन करणे; दुसऱ्या दिवशी माझ्या नावाने शंख करू नये.
आई-
निरंतर ऊर्ध्वश्रेणीकरण
पायाभूत सुविधांमध्ये सातत्याने होत असलेली दैनंदिन प्रगती पाहून यापुढे मनोगतासाठी निरंतर ऊर्ध्वश्रेणीकरणाचा अंगीकार करणे उचित दिसत आहे. त्याप्रमाणे आवश्यक ते बदल व्यवस्थेत केले जात आहेत. manogat.prashaasak@gmail.com ह्या पत्त्यावर आपल्या अडचणी व/वा सुचवणी विपत्राने कळवता येतील.