मी फुलांची रास झालो

                            मी फुलांची रास झालो,
                            श्रावणाचा मास झालो.

                            पाहुनी 'मधमस्त' भृंगा,
                            यौवनाची आस झालो.

                            जाहलो मी रुक्ष ऐसा,
                          -बौद्धीकाचा तास झालो.

                            ने सवे वाऱ्या मला तु,
                           -मृत्तिकेचा वास झालो.

                           ऐकता दु:खे तुझी मी,
                           कोरडा नि:श्वास झालो.

                          ती म्हणाली 'प्रिय' मजला!
                         -एवढा मी 'खास' झालो?

                           रे फसावे मृगजळांनी,
                           मी असा आभास झालो

                           मी तुझा ताईत होतो!
                         -नी अता मी फास झालो?

                           पाहुनी आकाशगंगा,
                           तारकांचा ध्यास झालो.

                           साधण्या समतोल आता,
                           मी तुळेची रास झालो.

                                          -मानस६