लाविले मी बी कशाचे हे कशाचे पीक आहे?
पाहिजे ते वाघ होते हे सशांचे पीक आहे!

आज कोण्या प्रेषिताच्या मागुती लपशील देवा?
झिंगले त्यांच्याच वेड्या वारसांचे पीक आहे.

देव किंवा दैत्य हा केवळ प्रमाणाचा फरक, बघ
द्वेषसूक्ते घोकणार्‍या मदरशांचे पीक आहे.

मी जसा आहे तसा कोणीच का ना ओळखावे?
का सभोती आंधळ्या या आरशांचे पीक आहे?

गोठलेली स्पंदने घन-तामसीशी रात्र, आणी
फुंकण्या अंगारविझल्या कोळशांचे पीक आहे.

-- पुलस्ति