आनंदाने१
हसता-हसता सरून जावे आनंदाने
मागे केवळ उरून जावे आनंदाने
डोळ्यांमधले सर्व चेहरे जिवंत व्हावे
अकस्मात घर भरून जावे आनंदाने
जिथे जिथे जाशील तू तुझ्या मागेमागे
बोट सुखाचे धरून जावे आनंदाने
पुन्हा मनाने अवखळ पोरासमान व्हावे
घरात यावे, घरून जावे आनंदाने
घरास जेव्हा पाय लावणे अशक्य व्हावे
नुसते दारावरून जावे आनंदाने
मिळालीच तर अशी देखणी व्यथा मिळावी
जिला पाहुनी झुरून जावे आनंदाने
सल कुठलाही जपून कोणा स्मरण्यापेक्षा
हेच बरे विस्मरून जावे आनंदाने
दोन घडींच्या भेटीसाठी यावे आणिक
जन्मासाठी ठरून२ जावे आनंदाने
जाण्याची घटका आली की अवतीभवती
जिवलग गोळा करून जावे आनंदाने
— चित्तरंजन
१."आनंदाने" हा शब्द, लागू होऊ शकेल तिथे, क्रियाविशेषण आणि नाम ह्या दोन्ही रूपांत वाचून बघावा.
२.ठरणे- (१) निश्चित होणे, निर्णय होणे, निश्चित करणे (२) थांबणे किंवा राहणे; एखाद्या जागी स्थायिक होणे; टिकणे, टिकून राहणे,