दूर कोनाड्यात चरखा पायपोसालाच खादी
जीर्ण झाली लोकशाही चालते ती फक्त गादी

क्रूर काही, शूर काही, भेटले मग्रूर काही
भेटले काही जिहादी, भेटले हिंदुत्त्ववादी

ह्या कश्या बुद्धीबळाच्या जीवघेण्या भ्रष्ट चाली?
भांडती रंगांवरूनी एकमेकांशीच प्यादी

कोण गेले? कोण मेले? गावही उद्ध्वस्त झाले
नेमकी राहून गेली तेवढी मतदारयादी

प्रेम नाही, मद्य नाही, काम नाही, दाम नाही
जोडले मी शब्द काही, लागलो त्यांच्याच नादी