संगिता जोशी यांची गझल. आशा करतो तुम्हालाही आवडेल ..
===================
कधीतरी हे मेघ जमावे माझ्यासाठी
मातीनेही गंध लुटावा माझ्यासाठी ..
दोन तळी अश्रूंची भरली त्यात मजेने
चंद्राने विरघळून जावे माझ्यासाठी...
प्रेमाने मज कवळून घेण्या , जीवनलतिके,
कधीतरी तुज हात फुटावे माझ्यासाठी...
आकाशातिल आनंदाच्या हिंदोळ्यांनो ,
ह्या बाजुने कधी झुलावे माझ्यासाठी .....
श्वासांची पडतील फुले हि जिथे उद्याला
तिथे तुझे पाऊल असावे माझ्यासाठी..
