१.
कसला धागा प्रिये तू अवचित भवती गुंफला
            बघ तुझ्या श्वासात माझा जीव वेडा गुंतला
झेलले मी बाण सारे... परी तयांनी वेढले
            स्निग्धशा आपुलकीने आसमंतही झिंगला !

                            २.
या नजरेला का अशी घालते साद
            तू निघून जाता फिरून येते याद
हे काळीज गाते गाणे नवभरतीचे
             मग बहरून येती तृणांकूर धरतीचे !

                            ३.
ती निघून गेली अन माघारी उरल्या पाऊलखुणा
            घरभर दिसती जरी माणसे, मी तिच्यावाचुनी उणा
ती हवीहवीशी मज वाटते... सकाळ - संध्याकाळ
            परी धुसर धुक्याची विण उकलणे नशिबी पुनः पुन्हा !