................................................
...दिवेलागणीच्या वेळी
................................................अशी उदास होऊन
बसू नकोस दारात
दिवेलागणीच्या वेळी
एकटेच बसू नये...
खिन्न खिन्न अंधारात
दिवेलागणीच्या वेळी
गतकाळच्या घायाळ
आठवणींना आवर
दिवेलागणीच्या वेळी
असू नये काळोखाचा
तुझ्या मनात वावर
दिवेलागणीच्या वेळी
चुकूनही आणू नको
कधी डोळ्यांतून पाणी
दिवेलागणीच्या वेळी
नको सांगू तिमिराला
तुझी विकल कहाणी
दिवेलागणीच्या वेळी
ऊठ, लाव सांजवात...
देवासमोर बसून
दिवेलागणीच्या वेळी
कर तमाचे स्वागत
मनमोकळे हसून
दिवेलागणीच्या वेळी
दूर जाईल काळोख
तुझे हसणे बघून
दिवेलागणीच्या वेळी
तु्झ्यातून मात्र नको
दूर जाऊ तू निघून
दिवेलागणीच्या वेळी
कधी विझू देऊ नको
तुझ्या काळजाचा दिवा
दिवेलागणीच्या वेळी
सांग, पुन्हा पुन्हा सांग -
`थरथरू नको जिवा `
दिवेलागणीच्या वेळी
प्रकाशाने उजळू दे
तुझे मन, घर-दार...
दिवेलागणीच्या वेळी
`सांजवेळे `च्या गळ्यात
तुझ्या हासण्याचा हार !
दिवेलागणीच्या वेळी....- प्रदीप कुलकर्णी
................................................
रचनाकाल ः १३ जुलै १९९३
................................................