डोळ्यांतून झरणाऱ्या मायेचे
गालान्वर ओघळणाऱ्या वेदनेचे
हर्षातून सांडणाऱ्या मोत्यांचे
...मन वाहत्या पाण्याचे ~~~
क्षणात वाढत्या वर्तुळांचे
मन अविचारी भोवऱ्यांचे
कोसळणाऱ्या प्रपातांचे
खोल अंधाऱ्या डोहाचे
... मन वाहत्या पाण्याचे ~~~
मन रेशमी तरंगांचे
उबदार चमचमत्या किरणांचे
उमलत्या गुलाबी कमळांचे
मन पाकळ्यांतिल दव बिंदुंचे
... मन वाहत्या पाण्याचे ~~~
मन थंडगार हिरवाइचे
शांत क्लांत विहगांचे
चिंब शहारल्या पानांचे
तरंगत्या नाजुक सोनफुलांचे
... मन वाहत्या पाण्याचे ~~~
रिमझिम श्रावण धारांचे
मन खळाळत्या निर्झराचे
उमटून पुसणाऱ्या प्रतिबिंबांचे
सरत्या रम्य किनाऱ्यांचे
... मन वाहत्या पाण्याचे ~~~
