पुन्हा पाणी दे ! पुन्हा पाणी दे!!
तगमग या जीवांची विलयाला ने
वाट पाहताना सारे जग झाले जुने
कोरडेच नदीनाले आभाळही सुने
सरीतून अमृताच्या संजीवन दे!
पुन्हा पाणी दे ! पुन्हा पाणी दे!!
स्पर्श तुझा परीसाचा जणू नवलाई
थेंबातून डोकावेल गर्द हिरवाई
सृष्टीला या चैतन्याचा नवा रंग दे!
पुन्हा पाणी दे ! पुन्हा पाणी दे!!
नको लावू वेळ आता तुटेल ही आस
उरामध्ये उरलेला शेवटचा श्वास
रूप मेघाचे घेऊन कृष्णवर्णी ये
पुन्हा पाणी दे ! पुन्हा पाणी दे!!
