दरबारात तुझ्या
भक्तीची मात झाली,
पोटासाठी दिवा झाला
चैनीसाठी वात झाली.

तुझ्या अभिषेकाचे पाणी
कोणत्या शेतात गेले,
पाण्यातूनही कमाई
अन पिकांचेही नफे झाले.

देवा तुझी भूक
कुणी जिवंत केली,
शांतीची यात्रा मनापासून
तिजोरीपर्यंत नेली.

तुझ्या बडेजावाने रे
नित्य डोळ्यांचे दिपणे,
विसरू लागले तुझे आता
भक्ताघरी खपणे.

तुझ्या वरास्तव आता
पुण्याई का साठवू?
ही जमलेली रक्कम सांग
कोणामार्फत पाठवू?
000