ध्यास मनी घेता दिसली पंढरीची वाट
    विठ्ठलाचे नाम घेता सरला पहा घाट |

        तुळशीमाळ हाती घेऊ मुखी ठेऊ नाम
        जीवनात राहू देऊ सदोदित राम |
 
    संसारात नित्य कष्ट आपुल्या जिवाला
    नाम घेणे ठरते इष्ट घोर ना जिवाला |

        करू यातना अर्पण चंद्रभागेपोटी 
        नाम नेईल तारून सुखाच्याच भेटी |
 
    दु:ख हानी दूर पळते येऊनिया वीट
    शांती समाधान मिळते मंदिरी अवीट |

        डोळ्यामध्ये घेऊ आता रूप साठवून
        विठ्ठलाला शरण माथा चरणी टेकवून |

    जीवनाला अर्थ गाता ग्यानबाची ओवी
    राम राम घेऊ जाता तुकोबाच्या गावी |