रस्त्याच्या कडेवरी     ----   राही माझी शेजारीण

    होती झोपडी झोपडी   ----   झोपडीची मालकिण

    भांडी होती ती  उपडी   ----   ती नव्हती भिकारीण

    चार घरी धुणी - भांडी   ----   पोलादी कारभारीण

    होती हांडी वर हांडी   ----   रिकामीच उतरण

    होई चिंध्यांची गोधडी   ----   लाजे पाहून शिंपीण  

    लेकरांची छान जोडी   ----   भारी कुशल सुईण

    मिळे घास खाई गोडी   ----   गात अभंग भक्तिण

    मनाजोगी चोळी साडी   ----   घेई- देई बोहारीण 

    घट्ट हिरवी बांगडी   ----   भरवीते कासारीण

    आता लिही बारा खडी   ----   साऱ्या सख्या नि माळीण

    शिकवण घडी घडी   ----   देई सई मास्तरीण

    द्वार- द्वार ती उघडी   ----   शारदेची पुजारीण 

    नाही शब्द येत तोंडी   ----   कैदाशिण वा वैरीण

    वाचे आवडी ये गोडी   ----   जागे हो माय-बहिण

    लावी जिव्हाळा बापडी   ---- ठेवा सांभळी मैत्रीण

    गा गा विजया आवडी   ----   जयदीप ओवाळीन 

                                            -- विजया केळकर