गझल
वृत्त: सती जलौघवेगा
लगावली: लगालगागा/लगालगागा/लगालगागा
*************************************************
अजून मी मोजतोच किंमत चुकामुकीची!
अजूनही भोगतो सजा मी उनाडकीची!!
कधीच येऊन गाव गेले...मला न पत्ता!
अजूनही टाकतो कशी पावले चुकीची!!
कितीक द्यावेत श्वास हप्ते दिल्याप्रमाणे?
हयात सरली, हयात झाली न मालकीची!
व्रतस्थ राहून काम माझे करायचो मी!
जरी मला ज्ञात नोकरी त्या न लायकीची!!
अलीकडे खेळण्यांपरी जाहलीत शस्त्रे....
कुणा न भीतीच राहिली आज बंदुकीची!
न हे पुढारी, न लोकनेते, असे भुतावळ!
निवडणुका फक्त एक लीला भुताटकीची!!
नव्या पिढीला नको म्हणे ते विवाहबंधन!
विरून गेली कथा इथे राम-जानकीची!!
-------प्रा.सतीश देवपूरकर
भूशास्त्र व खानिज तेल तंत्रज्ञान विभाग,
नौरोसजी वाडिया महाविद्यालय, पुणे.
फोन नंबर: ९८२२७८४९६१
