बटाटे व अंडी उकडून गार करून घ्यावीत.

ओले खोबरे, आले, लसूण, हिरवी मिरची, मीठ (आवडी/पसंतीप्रमाणे लिंबू, कोथिंबीर) वाटून चटणी करून घ्यावी. थोडक्यात, ओल्या नारळाची चटणी ज्याप्रकारची आवडते त्याप्रमाणे करून घ्यावी.

बटाटे कुस्करून ठेचून घ्यावेत. लगदा कणकेसारखा एकजीव व्हायला हवा. लगदा फार चिकट वाटल्यास वाळलेल्या पावाचा चुरा गरजेप्रमाणे घालावा. पण लगदा फार कोरडा व्हायला नको. चवीपुरते (बटाट्यापुरते) मीठ घालावे.

अंड्यांचे उभे (प्रत्येकी दोन) काप करावेत.

बटाट्याचा लगदा एक गोळी (टेबल टेनिसच्या चेंडूच्या आकाराचा) घ्यावा आणि किंचित पाणी लावून त्याची एक उथळ व पसरट दिवली करावी.

त्यावर चटणीचा एक छोटा थर लावून चिमूटभर मीठ (अंड्यापुरेसे) शिंपडावे. त्यावर अर्धे अंडे (कापलेला भाग खाली करून) ठेवावे. वरच्या घुमटावरही चटणी पसरून मोदक मिटतो तसा लगदा अंड्याभोवतीने मिटावा. लगदा अपुरा पडल्यास भर लावावी.

हा मुटका वाळलेल्या पावाच्या चुऱ्यात घोळवावा आणि आवडीप्रमाणे (आणि तब्येतीप्रमाणे) परतावा (शॅलो फ्राय) किंवा तळावा (डीप फ्राय).

जितका बटाट्याचा थर खरपूस (हे परतताना छान जमते) तितकी चव खुलून येते. चटणी आतच असल्याने बरोबर काही लागत नाही.

तरीही सवयीचे गुलाम टोमॅटो सॉस घेतीलच.