आमचे प्रेरणास्थान : श्री. इलाही जमादार यांची अप्रतिम गझल अंदाज आरशाचा वाटे खरा असावा. भीमराव पांचाळेंच्या आवाजात ती गझल इथे ऐका.
अंदाज तारखांचा चुकला जरा असावा
मधुचंद्र फार केला मी साजरा असावा
अंदाज बापसाचा वाटे खरा असावा
शेजारचाच चालू तो छोकरा असावा
जखमा कधी सुगंधी असतात का कुणाच्या?
कविराज काव्य रचता टल्ली जरा असावा
नाही अखेर कळले बोका कुठे पळाला
घेऊन मात्र गेला तो म्हावरा असावा
का आळ खंजिरावर घेता उगाच माझ्या
तुमच्याच एअरगनचा घुसला छरा असावा
काठावरी उतरली वसने खुशाल त्यांनी
चोरून पाहणारा का लाजरा असावा?
खेटून बायकोला बसुया, विचार केला
दारात दत्त म्हणुनी का सासरा असावा?
दारात ती उभी अन अधरा करून चंबू
तेव्हाच, हाय, भरला मी तोबरा असावा!
माझ्यावरी असावे ओझे विडंबनाचे
आडात काव्य तुमचे, मी पोहरा असावा
हा 'खोडसाळ' चेंडू घेई विकेट कवींची
हा ऑफब्रेक नाही, हा 'दूसरा' असावा
