भंगलेल्या मैफिलीची रात वेडी
रिक्त चषकांची अता ही रात वेडी
झाकले जे दुःख मी काळ्या घनांनी
उघडणाऱ्या त्या विजांची रात वेडी
पाहिले मी चांदणे तू ल्यायलेले
आज का मग आवसेची रात वेडी ?
मजसवे दिवसा जरी धरला अबोला
अंतरीचे गूज सांगे रात वेडी
तोडले मी बंधनांचे पाश सारे
उरली अता ओल्या व्रणांची रात वेडी
दिवस माझे ज्यांपरी बर्बाद झाले
घेऊन आली तीच स्वप्ने रात वेडी
मोजतो उरले किती मी दिवस आता
राहिली मोजायची ती रात वेडी
