तू हात पुढे जो केला

मी दिला त्यास आधार

समजून फोड तळहाती

 हळुवारपणे जपणार -

वचनास पाळण्याचा

केला पक्का निर्धार

चाललीस सप्तपदी तू

मी कधी न अंतरणार -

शंकेस कधी तो थारा

तू मनात ना देणार

जोडीची गोडी-गुलाबी

ही सदैव दिसणार -

तू कामावरून येता

तव स्वागत मी करणार

कप हाती गरम चहाचा

बिस्किटासवे देणार -

तारीख एक ती येता

मी खूष अती होणार

तव पगार माझ्या हाती..

 तुजभवती  मी फिरणार -

.. ‌स्वप्नातही असले भलते

तू आणू नको कुविचार !

जा सांग तुझ्या बापाला

मी घरजावई ना होणार !

ती केबी-फोरची संधी

मी नाही दवडणार

करोडपती बनण्याची

मी स्वप्ने ग बघणार !!