का निर्मिले जगाला ? पुसतोय देव माझा
बाजार खास इथला विकतोय देव माझा

निर्माण माणसाला केले किती खुषीने !
देवास विसरला तो झुरतोय देव माझा

नाठाळ राज्यकर्ते बेबंद राज्य करिती
वाटे कधी मनाला निजतोय देव माझा

गीते मधून ज्याने उपदेश काल केला
कंसा कडून इथल्या शिकतोय देव माझा

पापे अधर्म दिसता घेईन जन्म जगती
नुसतेच का असे हा म्हणतोय देव माझा ?

देवी रुपात केली स्त्री निर्मिती तयाने
पाहून हाल स्त्रीचे रडतोय देव माझा

जन्मा अधीच मृत्यू आम्ही दिल्या भृणांचा
आक्रोश ऐकण्याला नसतोय देव माझा

गाळून घाम कसता काळी जमीन, पदरी
नैराश्य आत्म्हत्त्या खसतोय देव माझा

अंधार राज्य करतो हरवून सूर्य गेला
डोळ्यास हात लावुन बसतोय देव माझा

"निशिकांत" श्वापदांच्या गर्दीत एक दिसला
माणूस त्यास मुजरा करतोय देव माझा

निशिकांत देशपांडे मो.नं. ९८९०७ ९९०२३
E Mail :-- दुवा क्र. १
प्रतिसादाची अपेक्षा