बाब छोटीशीच होती, अंतरी ती काचली
मी दिलेली तू फुले का पाठ फिरता फेकली?

तू मला समजून घ्यावे ही अपेक्षा का करू?
तुज नव्हे देवास सुध्दा, नार नाही उमगली

हात मी हाती दिला अन् आज कळले, मी तुझ्या
कासर्‍याशी गाठ माझ्या वेसणीची बांधली

आज का डोळ्यात माझ्या आसवांचा राबता?
तू दिलेल्या वंचनांची पूर्ण गाथा वाचली

जीवनाच्या वाळवंटी ओल नव्हती का म्हणू?
याद येता माय माझी, पापणी ओलावली

तू मला ना भेटण्याच्या, तोडल्या शपथा किती?
येउनी स्वप्नी मनाची तार का झंकारली?

चेहर्‍यावर कैक चेहरे, आम झाली संस्कृती
सत्त्य करण्याला उजागर, जिंदगी मी वेचली

सर्व सर्वांनाच मिळते हे कुणी सांगितले?
तप्त सूर्याला हवी पण प्राक्तनी ना सावली

भूत ग़ज़लांचे छळाया लागले "निशिकांत"ला
मांत्रिकाचा शोध घेते, बायको धास्तावली

निशिकांत देसपांडे मो.क्र.-- ९८९०७ ९९०२३