सौख्य भोगाया कुणाला भान आहे
वेदनेशी बांधले संधान आहे
फार अपमानीत झालो,...होत आहे
अन जगाला वाटतो सन्मान आहे
दुश्मनांची याचना करतो अताशा
आपल्यांचे घातकी अवसान आहे
आणले भानावरी अवघ्या जगाला
त्यामुळे बहुधा जरा बेभान आहे
रोज वस्तीतील गजबज वाढताहे
राजरस्ता आजही सुनसान आहे
तो विचारी,''काय बाप्पा दूध घेतो''?
हात जोडत बोललो,'' विज्ञान आहे''
ऐकवा, इर्शाद!! कोणी बोलले का?
संपले ''कैलास''चे आख्यान आहे.
--डॉ.कैलास गायकवाड
