नथीचा आकडा
काळ्या मातीत नांगर
असा फिरे कुंच्यावाणी
रंग हिरवा भरते
लालं काबाडाचं पाणी
रंग हिरवा हिरवा
नव्या नवरीचा चुडा
न्हातो घामाच्या अत्तरी
असा कुणबी रांगडा
भारी स्वप्नात दंगला
खुळा कुणबी रांगडा
घालू लक्ष्मीच्या नाकात
यंदा नथीचा आकडा
अशी कडाडली इज
गडी स्वप्नीच खपला
सुर्व्या भाळीचा तांबडा
कसा गारांनी विझला
सुर्व्या भाळीचा तांबडा
कसा गारांनी विझला........?????
-उद्धव कराड (मो. नं. ९८५०६८३०४५)
मु. जळगाव, ता. निफाड, जि. नाशिक.
