गोदरेजचे 'प्री-मॅरिनेटेड चिकन लॉलिपॉप'चे पाकीट फ्रीजमधून बाहेर काढून खोलीच्या सामान्य तापमानाला आणावे.

एक मार्ग म्हणजे फ्रीजमधून बाहेर काढून तीन-चार तास ठेवावे. तितका वेळ नसेल तर पातेलीभर मंद कोमट पाण्यात फ्रोजन पाकीट अख्खे घालावे. तीन-पाच मिनिटांनी पाणी बदलावे. तीन-चार वेळेस पाणी बदलले की काम होईल.

कांदा उभा नि पातळ कापून घ्यावा. डोसाभाजीसाठी कापतो तसा.

लसूण पाकळ्या ठेचून घ्याव्यात.

मिरच्यांचे एक पेर लांबीचे तुकडे करून घ्यावेत.

नॉन स्टिक खोलगट पॅनमध्ये तेल तापवावे.

तेल धुरावल्यावर ठेचलेली लसूण नि कापलेल्या मिरच्या घालून लगेच परतावे. लसूण जळकटू लागली की ज्योत बारीक न करता चिरलेला कांदा घालावा. व्यवस्थित परतत रहावे.

कांद्याचा रंग गुलाबी झाला की ३० मिली व्हिस्की घालावी. ज्योत मोठीच असेल. कांदा भक्कन आग पकडेल नि पाचेक सेकंदात विझेल. आता कांद्याचा रंग चॉकलेटी झालेला असेल. ज्योत बारीक करून कांद्यापुरते मीठ घालावे नि परतावे.

मग त्यात सामान्य तापमानाला आलेले लॉलिपॉप घालावेत. सगळा कॅरेमेलाईज्ड कांदा लॉलिपॉपना लागेल असे परतावे. त्यावर झाकण ठेवावे. ज्योत बारीकच असू द्यावी.

पाचेक मिनिटांत झाकणाला आतून वाफ धरेल. झाकण काढून ज्योत मोठी करावी आणि परतावे. आता तेल कडेला सुटू लागले असेल.

एक चमचा ओवा घालून परतावे. मग ज्योत बारीक करून मिनिटभर परतावे आणि उरलेली ३० मिली व्हिस्की घालावी. आता आग पकडणार नाही. लगेच झाकण ठेवावे नि बारीक ज्योतीवर दहा ते बारा मिनिटे शिजवावे.

लॉलिपॉप शिजले की (झाकण काढून काट्याने कोचून पहावे) ज्योत बंद करून दाण्यांचे भरड कूट घालावे नि परतावे.

एकूण प्रकरण चिकन मंचुरियन (ड्राय) सदृश होते. पाच मिनिटांत वाढायला तयार आहे.