आमची प्रेरणा पुन्हा एकदा प्रदिप कुलकर्णींची सुरेख कविता ...पोरी वयात आल्या !
चोरी घरात झाली...!
चोरी घरात झाली, झाली घरात चोरी !
खाली करून गेला सगळी बघा तिजोरी !
होत्या समस्त नोटा त्यांनी लुटून नेल्या
माझीच का तिजोरी लुटलीस सांग मेल्या
छाती पिटून घेतो, लाला अता किशोरी....!
दिवसा दिसून आले लालास आज तारे
देहातले निघोनी गेलेत त्राण सारे
अंधार दाटलेला होता तया समोरी !
पैसेच फक्त तुजला होते हवेहवेसे...
लाला जनास केले तू ही नकोनकोसे...
अन्याय खूप केले होतेस तू अघोरी !
भलताच हा बिलंदर दिसतोय चोर मजला
मज वाटले जसे की रॉबिन हूड आला
सोडून खूण गेला अरसा तिथे बिलोरी !
***
थोडे जपून लाला वागायला नको का ?
झोपेतही जरासे जागायला नको का ?
...याच्यामुळेच आली हाती तुझ्या कटोरी !
***
...चोरी घरात झाली... झाली घरात चोरी !
- केशवसुमार
