तुझं मोकळं मोकळं हसू
मलाही मोकळं करणार होतं
पण---
ओठांच्या कोपऱ्यात तुझ्या
मुरड दिसली किंचितशी
अन्
अवघडलेपणाची तेव्हाच
जाणीव झाली मला जराशी

तुझ्या नाचऱ्या डोळ्यांतले मोर
माझेही डोळे नाचवणार होते
पण--
असू-नसू टपटपतं पाणी
माझ्या नजरेनं टिपलं होतं
अन्
पटकन मिटून नेत्रपिसारा
मलाच कसंनुसं झालं होतं

तुझा हळुचसा आश्वासक स्पर्श
मला धीराचा ठरणार होत
पण--
सूक्ष्म कंप तुझ्या हातांचा
कसा न जाणो मला उमगला
अन्
माझाच धीर एकवटून
मीच तुझा तोल सावरला!