झाले कोकण पारखे 
                 
                      झाले कोकण पारखे
                     आता पुन्हा भेट नाही
                     आत्याबाईच्या मायेची
                     आता पुन्हा गाठ नाही.

                     आता नाही व्हावयाचा,
                     हवाहवासा प्रवास,
                     आता जाईल उन्हाळा,
                     कसा उदास उदास.

                     नाही पोफळीच्या बागा,
                     अन नारळाची झाडे,
                     आता दर्शन ह्यांचे का,
                     फक्त स्वप्नातून घडे?

                      निळे-हिरवे डोंगर,
                     आता नाही दिसायचे,
                     झुळझुळत्या झऱ्यात,
                     पुन्हा कधी नहायचे?

                     कैक वर्षांचा शिरस्ता,
                     बघा आता चुकणार,
                     मने ताजी करणारी,
                     यात्रा नाही घडणार

                     आता शेवटची खेप,
                     द्याया तिला तिलांजली
                     कोकणची माती आता,
                     नाही लागणार भाळी

                     योग सरता भेटीचा,
                     कधी भेटते का कोणी
                     आता राहतील फक्त
                     कोकणच्या आठवणी.

                                 -मानस६