बोललेले शब्द काही, आणि मौनातील गाणी,

गंध ओल्या मोगऱ्याचा, पावसाचे तेच पाणी,

सारखे आहेत सारे ते जुने संदर्भ भोळे,

फक्त वाटा त्या निराळ्या, आणि मी मिटलेत डोळे ॥

कोकिळेचा सूर ताजा, आमराईतील मोहोर

बंद झाली परसदारे, आठवांचा फक्त वावर

ओसरीवर बांधलेला तो वसंतातील झोका

आज माझे एकटे घर आणि एकाकी झरोका॥

आज का आली अचानक पाउले गंधाळलेली ?

आठवे ओलीच सारी, जी कधीची टाळलेली

आज आहे एकटा मी, पावसाचे तेच पाणी-

-गातसे, ओठातल्या ओठात मुरलेली विराणी ॥