तुझा माझ्याशी अबोला फार शेफारला आहे ।
तिचा शेजार मात्र माझ्यासाठीच आसूसलेला ॥
तुझी नजर कां कोण जाणे आग ओकीत आहे ।
तिचे नयनशर मात्र माझे हृदय गोंजारणारे ॥
जुन्या प्रेमपत्रातील तुझ्या फितुर झालेली अक्षरे ।
तिचे मुग्ध मौन मात्र सदा माझेच गीत गाणारे ॥
तूं मिठीत वाहिलेल्या शपथांना वंचनेची फिकिर नाही ।
तिचे मूक समर्पण मात्र माझी श्रद्धा जोपासणारे ॥
तुझ्या मनातिल संशयाला मृगजळाचा वेग आहे ।
विश्वास तिच्या मनातिल माझाच भरवसा ठेवणारा ॥
आनंद तुझ्या मनातिल बेचैनीत कुढतो आहे ।
तिच्या रोमरोमात मात्र हर्ष असीम बहरणारा ॥
अपराधीपणाची चिंता मन माझे पोखरित होती ।
खऱ्याखोट्याचा कर तूं निवाडा तोच तुझी सुटका करणारा ॥
