सत्यास नको व्यत्यास
महाजन सांगती सारे ।
असत्याविना सत्ता नसे
पुढारी दाखविती सारे ॥
रमेचा हव्यास नको
ती चंचला सांगती सारे ।
असत्याची शृंखला तिज कोंडते
पुढारी दाखविती सारे ॥
कनक कांता शीलभंजक
साधुजन सांगती सारे ।
मद्य मैथुन पुरुषार्थ लक्षण
पुढारी दाखविती सारे ॥
विद्या व्यासंग सांडू नये
थोरजन सांगती सारे ।
विद्येचा धंदा बरकतीचा
पुढारी दाखविती सारे ॥
स्वाभिमाने राष्ट्र फुलते
वीरजन सांगती सारे ।
बळिपुढे लांगुलचालन बरे
पुढारी दाखविती सारे ॥
सुनीतीचा नको संन्यास
गुरुजन सांगती सारे ।
असंगाच्या संगाविना न राजेपण
पुढारी दाखविती सारे ॥
पुढारी जे करिती रूढ
तेची सत्य जाणावे कां रे?
त्याच सत्याला प्रतिष्ठा
बोध नवा घ्यावा कां रे?
