अदृश्यच असतो क्रूस कधी
प्रेषित नसतो माणूस कधी
काही जखमा भरतात कुठे
खातात मुळासह ऊस कधी
मी तळमळतो मी हरमळतो
ही कूस कधी ती कूस कधी
आहेसच की माझ्यातच तू
अजिबात नको भेटूस कधी
फुलता फुलता फुलणार फुले
मुद्दाम नको बहरूस कधी
इच्छा सगळ्या सगळ्या सवती
संपेल बरे धुसफूस कधी
कोठून अचानक मन उडते
कारण घडते फडतूस कधी
रेखीव तरी आहेस किती
मोडून पहा ना मूस कधी
सोडू अवघे लालित्य जरा
घालू बरवा धुडगूस कधी
भेगाळत जाते शेत कुठे
फिरतो वणवण पाऊस कधी
तो दिवस दिवसभर रणरणतो
होईल दिवस तांबूस कधी
